政情：公民講場︰做龜又做兔 鬍鬚曾講晒

財政司司長曾俊華（鬍鬚曾）尋日發表每周網誌，先後用飛機防撞預警同龜兔賽跑兩個比喻嚟闡釋佢嘅理財哲學。佢話烏龜係收入，白兔係開支，即使以前白兔一直掛住瞓覺，等烏龜可以行先，但只要白兔喺呢一刻唔再瞓覺，唔理烏龜領先幾遠，速度較快嘅白兔始終都會超越烏龜，證明無論香港有幾多盈餘，一旦開支超越收入，就會好容易會出現財赤。佢又話自己一定會審慎理財，唔會容許香港出現結構性財赤。鬍鬚曾一時話香港收入多，一時又話財政開支大，一時係龜一時係兔，真係神又係佢鬼又係佢。