政情：公民講場：社會動盪生意冰封 商界嘆等食西北風

香港係亞洲嘅運輸及貿易樞紐，廿多年來都被西方世界評為全球最自由經濟體，然而去年嘅反修例運動，商戶就算免於舖面被破壞，亦逃唔過生意額大跌。今年年初爆發嘅新冠肺炎疫情，商界更因政府嘅禁聚令而陷入冰封狀態，儘管可得政府補助，但亦只能苟延殘喘。政府不但控制疫情無方，亦無法解決社會上嘅深層次矛盾，商戶縱使捱過今次疫情，日後亦要面對動盪嘅社會環境，難怪香港總商會方面亦感嘆，香港可能再唔係營商嘅樂土。總商會發出嘅警號，商經局局長邱騰華要認真看待呀，若果無法維持良好嘅營商環境，恐怕大家就要食西北風啦！