政情：譚凱邦搶選票 勢入新同盟

Gary同Roy喺兩年前，於網民發起為時代廣場UA戲院被迫遷嘅「悼念」活動走埋一齊，上星期五新同盟成員去港鐵扮沙甸魚抗議旅客過多，當日Roy都係度，唔知仲以為佢入咗黨添。我哋尋日問Roy，佢就承認依家同新同盟「談婚論嫁」，好大機會入黨，又話咁多個政黨中，以新同盟最着重本土議題，一直都有合作，要入政黨「非新同盟莫屬」，睇嚟非君不嫁咁喎。

傳區選出戰馬灣

Roy由○八年立法會選舉起「屢敗屢戰」，佢話將來會考慮參選，但係冇透露詳情。不過我哋就聽聞，佢諗住明年區議會出選馬灣，主打老本行，即係噪音同環保議題，之後就再選立法會新西選區。佢個如意算盤要打得響，或者要揼本搬入馬灣住喇。