政情：白鴿一團糟 馮煒光退黨
本報日前獨家踢爆民主黨（白鴿黨）南區區議員馮煒光應徵做副局長，白鴿黨高層不得不高調回應，仲車輪轉去鞭撻佢「賣黨求榮」，聲言要發起聯署革除佢黨籍，揭露該黨立立亂，高層無能管唔掂啲下屬。連日來一直「潛水」嘅馮煒光尋日就大反擊，仲扮晒慷慨就義，以「我以我血薦軒轅」為題，寫晒血書咁宣布退黨。白鴿黨搞到呢個地步，真係爛到透，選民喺九月投票前真係要睇清睇楚。
立會參選名單 變完又變
馮煒光喺同黨友訣別嘅「血書」裏面，否認自己係叛徒，又提到《基本法》內規定「香港市民有選擇職業的自由」，又話唔畀黨員加入政府嘅要求未經黨大會通過。不過，黨主席何俊仁就迅速回應，話黨員如果未經中委會同意，不得接受公職任命嘅規定，已載入該黨嘅行為守則內。無論誰是誰非，總之馮煒光今次兩頭唔到岸已幾乎係事實，試問新一屆政府又點會任用一個有咁多包袱嘅人做副局長呢？
該黨除咗人事出問題外，九月立法會選舉嘅參選名單上亦都搞到亂晒龍，點解咁講呢？白鴿黨喺選舉「擺位」上變完又變。白鴿黨尋日又開會，話傾立法會選舉部署，但之前就放晒風，話原本由立法會議員李永達老婆、屯門區議員陳樹英出選新界西，但轉頭又擔心陳樹英對選民無乜吸引力，所以又話想換人，但換入嚟嘅係前立法局議員、元朗區議員黃偉賢，好彩最後仍維持由陳樹英出選，為咗霸位，連啲陳年舊人都用埋，真係笑大人個口。
人嘅離合只係小事，黨嘅前途係大事。九月立法會選舉選情處處烽煙，不過市民嘅眼睛都係雪亮嘅，如果見到一個好似白鴿黨咁立立亂、內部爛到透嘅政黨，真係見到都掉頭走，仲話投票畀你喎。
究竟白鴿黨喺九月嘅選情係點，就要睇吓市民到時點樣表態喇。