下星期五就係農曆大年初一，批發及零售界立法會議員方剛呢幾日頻頻落區向攤檔商戶拜早年，尋日佢就去咗灣仔太原街及銅鑼灣渣甸坊露天市集，向商戶派發揮春。方剛以往都有派揮春習慣，唔少檔主同市民都同佢打招呼，有檔主仲話佢個樣愈嚟愈後生添，期間大家互相祝願、喜氣洋洋。方剛坦言，對來年經濟預測較為謹慎，加上美國有機會加息，有意買樓人士就要諗過度過喇。不過，佢最尾都祝願各位身體健康、生意興隆、貨如輪轉，不愧為生意人，唔怪得之咁受檔主歡迎啦！
