嘥40萬建燈塔淪擺設
四十萬元建造燈塔得個「睇」字，政府變「大嘥鬼」！以漁港風貌為主題的鴨脷洲海濱長廊美化工程進行得如火如荼，但屹立長廊的新建燈塔原來僅屬「裝飾」，遊人不能登塔欣賞風景。儘管諮詢期內區議會曾提出不少為燈塔「增值」的建議，可惜均未獲土木署接納；區議員不滿當局一意孤行，造成嚴重浪費。
鴨脷洲海濱長廊美化工程屬香港仔旅遊發展項目之一，透過加建具漁港特色建築以吸引本港及外地遊客。林先生行經海濱長廊，發現一座燈塔形裝置將近完工，滿以為落成後可登上燈塔飽覽海景，未料竟獲悉燈塔儼如紙板，僅「有得睇、冇得上」，「同啲裝修工人傾開，佢哋話裏面係空心嘅，根本冇預畀人上去，咁起座塔嚟做咩？簡直嘥料又嘥錢！」
當局稱遷就狹窄地形
記者曾到現場了解，只見長廊一帶工程尚未完成，燈塔則已基本成形，不但建有拱門，門外亦有數級台階，頂端亦裝有燈罩及矮圍欄。不過，記者向在場工人了解時，工人承認燈塔將不會開放予遊人登上，更笑說：「第日如果塔頂啲燈膽壞咗就麻煩，要爬上去整！」根據南區區議會網頁資料，有關燈塔內部牆身只設有一把梯子，其餘位置均屬「空心」。
土木工程拓展署發言人解釋，鴨脷洲海濱長廊地形狹窄，燈塔裝置體積不宜過大，設計概念遂以觀賞及拍照為主要目的，亦因此不設觀景台。發言人續說，燈塔裝置高約十米，圓形塔身直徑約四米，工程造價約四十萬元，強調整體工程包括裝置設計已獲南區區議會及相關地區團體支持。
區議會曾促更改設計
「我哋喺諮詢期已經要求開放燈塔畀遊客上去觀光，只係政府一意孤行，最後使咗咁多錢起座淨係得個『睇』字嘅裝飾品，真係好浪費！」南區區議會社區事務及旅遊發展委員會委員區諾軒直斥土木署的回應不符事實，不滿政府未有物盡其用，要求當局考慮於塔內加設旋轉鐵梯並加密塔頂外圍欄，既解決安全問題，亦可增加燈塔用途。
委員會另一委員羅健熙亦不滿當局「夾硬嚟」，堅拒更改設計，「部門畀張設計圖我哋睇嗰陣已經覺得好古怪，又解釋唔到點解唔開放畀市民用！佢仲話設計已經定咗，冇得改！」羅認為政府以遊客安全為先雖無可厚非，但不能以「斬腳趾避沙蟲」方式處理，要求當局就燈塔的用途再作詳細考慮。
記者：何穎賢