中環出更：王庭聰嫁女 政商文化界齊賀

講到嫁女，王庭聰就話冇咩特別壓力，最緊要女婿識得尊重人，至於想幾時抱孫，就更加唔急得。至於Crystal自己就緊張得多，仲去咗三個地方影婚紗相，由於到賀賓客非常之多，Crystal同老公Jimmy忙到成晚滿場飛，影相影到變布景板咁滯，但依然笑容滿面幸福滿瀉。

饒宗頤祝「佳偶天生」

原來好多名人都同王庭聰好有淵源，好似東區區議員李進秋咁，當日就帶埋一對金鐲送畀Crystal，原來佢係王庭聰契妹，亦即係新娘嘅契姑姐，唔怪得不忘帶埋厚禮喇。至於饒宗頤亦送咗一副墨寶同字畫畀一對新人，祝佢地「佳偶天生」。

孫大倫（左）與太太到賀。	王麗霞同老公邢高福幸福滿瀉。	朱鼎健咁捧場，原來王庭聰經常到佢嘅觀瀾湖高爾夫球場打波。

其他賓客亦悉心打扮，好似行政會議成員葉劉淑儀咁，當日就以中性打扮現身，皆因佢知道新娘本身係做婚禮行業，所以就想特別啲玩反寸。立法會議員黃國健亦有到場，問到佢同王庭聰係咩關係時，佢就話自己嘅助理啱啱被王庭聰撬走咗，不過佢話係講笑啫，希望佢個女嫁得好先係真嘅。

卓妮