中環出更：爆粗馬恩國 現身幫港出聲
去年喺立法會政制事務委員會同「長毛」梁國雄激辯期間爆英文粗口嘅大律師馬恩國，卓妮尋日竟然見佢現身「幫港出聲」記者會，仲做咗組織嘅法律小組成員。原來發起人周融去年八至九月搵佢傾，希望佢喺法律範疇幫手，所以就一齊開會。咁佢被人投訴爆粗嗰單嘢又點呢？馬恩國話，大律師公會聆訊未傳召到佢。
講番個記者會，周融以個人身份提出特首普選方案，建議三十名提名委員會成員支持就可以「入閘」，但提委會以全票制選出三名候選人「出閘」，選民先至一人一票選出特首。有人話全票制係篩選，周融就反問「篩選點解係負面？世上邊個國家冇篩選，美國民主共和兩黨都有……一個冇得選，兩個（其中一個）玩晒，三個中間落墨」。
周融又質疑「點解唔信任提委會？」，叫大家多啲信任。他又用立法會超級區議會議員解釋設人數上限，話美國經公民提名嘅候選人得票「輸咗畀馮檢基，連劉江華都唔夠多票」，而最終只有足夠財力嘅人才能競選，製造不公。
卓妮