政情：社民連自製七呎路福西

社民連班兄弟早排連日趕工，由深水埗買布、買棉花，親手縫製七呎巨型路福西，趁尋日拆禮物日帶同巨型路福西到禮賓府請願，不但吸引唔少粉絲爭住同老翻路福西合照，連黨友都唔捨得掟路福西入禮賓府，決定留為己用。適逢元旦遊行同元宵花市開檔臨近，有支持者建議乾脆帶埋巨型路福西出巡「撲水」，遊行人士要放低捐款先可以同路福西合照。

吳文遠入定貨撲水

講起撲水，社民連副主席吳文遠最有先見之明，月初喺英國出差掃咗廿隻路福西返港畀支持者競投，唔使一個月即籌得兩萬元，幫閒閒哋揹住一、兩單官司喺身嘅社民連兄弟籌錢救急。