政情：劉江華幫攝影展倒米
適逢聖誕新年假期，市民無論出外旅行或留港消費，用相機或手機隨時影低幾張相記錄吓生活點滴，已係網絡時代嘅潮流。不過，政制及內地事務局副局長劉江華尋日出席一個慈善攝影籌款展覽時，自爆唔係咁鍾意影相，就算去旅行都唔帶相機，因為佢寧願將人物景色全部記喺個腦度，唔使因掛住影相錯過咗風景喎！
推銷政改 自爆不愛拍照
照佢咁講，唔通咁多年嚟佢都冇乜影過家庭相？如果連家庭相都冇，咁第日年紀大咗記憶力衰退，佢嘅人生咪一片空白？話時話，人哋請佢去做攝影展主禮嘉賓，佢竟然話自己唔鍾意影相，會否覺得有啲倒米呢？
唔單止咁，劉江華喺台上致詞時仲趁機推銷政改，話明年係政改諮詢最關鍵嘅一年，希望各界朋友、各路英雄有商有量，搵出一個大家可以接受嘅方案，令普選可以落實。佢一輪嘴硬銷完，連主持人都忍唔住寸佢話，估唔到劉副局長連公眾假期都好似冇放假咁。