政情：申訴專員去立會申訴
家家有本難唸的經，人人都有難言之隱。市民對政府部門或公營機構不滿，可以向申訴專員公署投訴，但申訴專員黎年想投訴，又可以去邊度呢？尋日就有機會喇，話說黎年上立法會簡報公署過去一年工作，但講講吓變成自己「申訴」，猛講平時處理埋啲奇難雜症投訴，又反駁議員無理質疑，黎年呻完一大輪後，成個樣即刻鬆晒。
自爆有時做埋社署嗰份
申訴專員公署年報早前已公布，黎年尋日只係循例到立法會解話，但班議員亦「雞蛋裏挑骨頭」，例如有議員質疑公署辦事效率，問點解公署每年最少有千幾宗投訴個案無法跟進。黎年聽到後隨即苦笑，坦言有時啲投訴好難跟進，有啲係一堆文字、一堆剪報，似係表達意見多過投訴，部分市民仲隔幾日就「申訴」，反問各位議員都應該收過類似投訴，無理由唔明白喎。
黎年又話，近年多咗公務員向公署投訴，例如啲公務員投訴上司對自己嘅表現評分過低，不滿上司調自己坐第二度，但公署根本無權限去處理呢類問題，所以只能愛莫難助。黎年講講吓，仲大爆公署有時要做埋社會福利署嘅角色，叫投訴人同被投訴人雙方坐低調解。
曾經有市民母親過世後火葬遺體，該市民就投訴火葬場嘅食環署職員逼佢「按掣」將棺木送入火爐，感覺猶如自己親手燒死母親。黎年話，遺體火葬嘅正常程序確實由遺體嘅親人「按掣」，但又唔可以漠視市民投訴，惟有約雙方調解，食環署人員解釋火爐內部仲有工作人員最後「按掣」點火，所以該市民唔算直接將母親送入火爐火化，嗰位市民聽完即時解開心結。
眼見黎年滴水不漏，但班議員仲要繼續抽水，議員何秀蘭就問佢離職後，點確保下任專員繼續持平公正？點知黎年四両撥千斤，聲言權力就喺議員手中，只要立法會全體三分二議員通過，就可踢走個專員，寸到何秀蘭應一應。