後巷變垃圾崗 食署懶執法
「成條後巷都係垃圾，仲有幾袋廚餘放喺地下，啲污糟水係咁流出嚟，又臭又核突，呢排夜晚仲多咗老鼠周圍走！」姚小姐不時行經深水埗汝州街，發現後巷每晚均堆積大量發臭垃圾，至翌日上班路過時仍未見有人清理，不滿垃圾亂放惹蟲鼠，即使移走後地面亦留下難以清洗的污漬。
食物環境衞生署發言人指出，今年曾接獲一宗相關投訴，接獲本報轉介後曾派員巡查，亦發現有垃圾，已安排街道潔淨服務承辦商清理及清洗。
「食環署咁做只係治標唔治本，啲人掉垃圾喺公眾地方，政府唔執法不特止，仲幫佢哋清理埋，咁搞法遲早個個都貪方便亂丟垃圾！」姚小姐認為食環署不應只「執手尾」，必須揪出亂放垃圾黑手，遏止違法行為。