政情：車位足夠論 恐惹風「波」
香港地衣食住行樣樣都缺，乜都要爭餐懵，原來連旅遊巴呢類商用泊位都出現嚴重短缺，唔少商用車輛惟有愈泊愈遠，影響生計。不過，發展局局長陳茂波拒絕接受現實，指全港除咗中西區車位比較緊張外，其他區車位供應足夠咁話。聽落熟口熟面，咪同教育局局長吳克儉早前死撐全港幼稚園學位充足，而被全港家長炮轟嘅言論一樣？
上海街 漆咸道南匱乏
立法會航運交通界議員易志明（阿易）尋日代表業界，向政府反映唔少商用車因為泊位不足，而被迫跨區或喺偏遠地區泊車，不但費時失事兼嘥油錢，仲製造更多廢氣污染環境，愈講愈大鑊。有議員仲列舉上海街、漆咸道南嘅泊位一樣嚴重短缺。
陳茂波解釋，係咪興建停車場需要考慮該區停車場嘅使用情況、市民支持度及會否增加該區車流量造成擠塞。不過，興建停車場講到尾都係商業決定，政府口口聲聲劃出五幅地興建多層式停車場，但一直只聞樓梯響，未來仲有政府停車場遭拆卸同轉為私營，全港車位足夠呢番言論睇怕都頂唔住，小心步吳克儉後塵，被全港車主同搵食司機聲討呀！