自由黨早前喺油尖旺區議會京士柏選區補選失利，點知屋漏兼逢連夜雨。本身自由黨只係得十三名區議員，地區實力已唔算雄厚，我哋知道最近自由黨再有兩名區議員退黨，一位係元朗區陳思靜，另一位係黃大仙黃錦超。自由黨主席周梁淑怡（莎姐）證實兩人退黨，不過莎姐話政黨嘅嘢有入有出好正常，未來會積極諗計吸引人入黨。
今次退黨嘅兩名區議員有老有嫩，一個係元朗陳思靜，另一個係現任黃大仙區議會副主席黃錦超。兩人十月初正式退黨，陳思靜話退黨原因好簡單，主因係內部出現問題，加上該黨喺新西無投放資源，既然唔夾就不如分開發展。但有無政黨搵佢過檔，佢亦好老實話：「無就呃你啦！」
至於黃錦超退黨主因，佢話係不滿自由黨選舉部署亂晒龍，例如舊年立法會選舉，明明佢紮根九龍東多年，但黨竟然叫佢去港島助選，最近一次補選，又叫佢去助選，佢話同黨高層嘈過好多次，但對方唔明白，惟有退黨。
雖然黃錦超係委任議員，但一直有傳佢轉戰直選，佢都承認以獨立身份打選戰較為有利。我哋聽聞負責協調人士已安排咗譚香文嘅地盤畀佢開地區辦事處，明顯搵位畀佢落腳。唔知黃錦超退出自由黨，係咪其中一個協議呢？