政情:左派借臻美打沉黃英琦

本來係文化局局長大熱人選嘅黃英琦(Ada)做唔成局長,阻力來自傳統左派。據聞深層次左派極力反對下任主要官員名單上有黃英琦,仲不惜提出如果新政府主要官員名單上有Ada,佢哋就唔會支持政府新架構通過。權衡輕重之下,不能不將黃英琦個名喺名單上抽走。

據聞深層次左派以身為校監嘅Ada喺臻美黃乾亨學校事件上管理不善為由,拒絕贊成佢做局長。Ada創辦兆基創意書院,幫唔少有藝術天分嘅學生發揮佢哋嘅才華,又無人講喎。實際上臻美事件只係口實,傳統左派不滿Ada,主要係涉及幾年前嘅牙齒印。

雖然Ada家族同中央關係良好,但○三年佢贏咗區議會之後,得到泛民主派區議員支持,做埋灣仔區議會主席,副主席亦由泛民中人做,搞到當時灣仔區議會內嘅建制派人物好不滿。

事隔九年,佢哋條氣仲係chok住,可能唔想畀Ada做文化局局長之後,以後有嘢益晒泛民,唔益佢哋啩。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報