政情：謝偉俊撲籌買樓心情靚
立法會議員謝偉俊（Paul）最近落力排隊買樓，繼早前排隊買「天璽」，佢前日又去買「The Austin」。阿Paul話佢女友喺「The Austin」抽到二百零七號籌，佢哋諗住有啲準買家臨時放棄單位，所以相信女友可購入兩伙。至於佢自己，就抽到四百號籌，相信機會不大。
前日約下午一點鐘，我哋喺尖沙咀「The Austin」嘅售樓處外見阿Paul同佢女友，阿Paul當時頭戴啡色紳士帽，身穿橙紅色T恤及長褲，兩人心情極為輕鬆，莫非已抽中，可大量購入八折單位？阿Paul當晚應我哋查詢，話輕鬆係因為今次嘅售樓安排得好，而佢就睇好高鐵通車後，為呢區帶來嘅發展。佢哋早前排隊買「天璽」，但結果係未能抽中。
阿Paul張相喺「The Austin」樓盤網頁出現，佢仲同會德豐副主席梁志堅合照添，唔知情嘅仲以為阿Paul做咗樓盤嘅代言人添。