政情：有相為證：逆線泊車 恐有罪「葉」

身兼行政會議成員嘅立法會議員林健鋒今年七．一涉逆線行車被控不小心駕駛，自此政界中人對「逆線」呢兩個字都好敏感，點知尋日又發生一宗「逆線」事件。有讀者向我哋投訴，話見到一部私家車逆線停泊喺金鐘政府總部附近馬路邊，我哋查閱車輛登記後，發現呢部私家車原來係議員葉國謙擁有。阿謙接受查詢時話，自己當時喺停車場駛出來等朋友上車，佢為免阻礙其他車輛離開停車場，於是將部車駛過對面線停低，然後落車睇吓朋友到未，強調只係停咗一分鐘。雖然目前並無法例規管逆線泊車，但佢將部車停喺對面逆線，點都要逆線駛過去對面線先至得，因住被警方檢控不小心駕駛呀！