政情：倫敦市長訪港 不談普選
英國倫敦市長約翰遜（Boris Johnson）尋日旋風式訪港，除咗力銷兩地商貿合作之外，期間仲玩盡海陸空，唔單止搭車又搭船，仲連直升機都出動埋，非常搶鏡。不過，當佢被問到香港普選等政治議題時就顯得非常慎言，多番強調呢啲嘢係香港嘅事（A Matter Of Hong Kong），不方便作出評論，認真安守本分。
玩盡海陸空 再晤CY
約翰遜早前已率先搭直升機喺赤鱲角上空翱翔，俯瞰成個香港機場跑道建設，為爭取喺英國興建新機場一事「偷師」。至於尋日早上，佢就乘坐由英國運來嘅新型倫敦巴士到灣仔碼頭，再轉乘天星小輪暢遊維港。
雖然佢全程被傳媒「大包圍」追訪，無時間欣賞維港兩岸景色，但佢依然笑笑口有問必答，即使唔回答政治議題，但就大讚港人充滿「事必做到精神」（Can do spirit），仲話希望增加來往兩地嘅直航機數量。約翰遜下午再到特首辦與特首梁振英會面，就兩地經貿事宜交換意見，梁鼓勵當地企業到港發展，並開拓內地市場。