中環出更：大劉 肥仔岳 前後腳開飯
捲入澳門世紀巨貪案嘅華人置業主席劉鑾雄（大劉），尋日繼續健步如飛去灣仔富豪飯堂食晏，問佢點解突然換律師？對官司有冇回應？佢都木無表情，一概唔答。大劉進入酒樓後十分鐘，被質疑喺海洋公園酒店項目有利益衝突嘅香港旅遊發展局主席林建岳（肥仔岳）就突然出現，兩人前後腳到飯堂食飯，莫非係約埋一齊有偈傾？認真耐人尋味。
大劉黑衫黑褲黑口黑面
尋日正午十二點許，大劉嘅五名保安已喺富豪飯堂門外準備，半小時後，一名交通警員見飯堂門外聚集咁多保安，即舉起手機拍下後離去。十二點四十分，大劉同秘書乘座駕抵達，大劉着上黑色厚身外套，配上黑褲，加上黑口黑面兼木無表情，真係夠晒黑，對於換律師及官司等問題，都一概唔回答。
十分鐘後，肥仔岳獨自一人到達飯堂，見佢一邊講電話一邊行入飯堂，看似神色凝重，食咗唔夠一個鐘就離開。咁啱前日肥仔岳旗下麗新發展成為海洋公園海洋酒店嘅首選投標者，於是被外界質疑佢身為旅發局主席，又係香港主要嘅旅遊景點投資者，到時會否豪使公帑偏幫海洋公園做宣傳？莫非佢為咗呢單嘢煩緊呢？
卓妮