政情：跳船潮蔓延副局？
政府「跳船潮」陰霾揮之不去，三名前任或現任政治助理莫宜端、何建宗同張秀麗先後因不同原因離開政府，原本諗住發展局同商務及經濟發展局搵到副局長可為梁班子打氣沖喜，但政治總係波譎雲詭，政圈前日突然傳出有某副局長決定「跳船」辭職，令政府上下紛紛猜測邊個係「跳船者」。呢個政治不穩定因素再次籠罩梁班子，睇嚟政府要盡快澄清傳聞嘅真偽，掃除各種政治不穩定因素。
港府最近接連公布或有風聲傳出有志之士加入政府問責團隊，除咗下周四履新出任商務及經濟發展局副局長梁敬國外，發展局亦搵到合適人選，另外南區區議員馮煒光有望出任新聞統籌專員，佢自比美國白宮發言人嘅言論更係政圈茶餘飯後熱議話題。然而，梁班子內部傳出另一次跳船疑雲，消息透露今次層級由政助「升呢」至副局長，引起政府內部一陣騷動同猜測。
翻查資料顯示，十二個政策局之中，撇除公務員事務局本身無副局長一職，有九個政策局都有副局長，綜合各方消息估計，「跳船」疑似高危人士分別係財經事務及庫務局副局長梁鳳儀，以及環境局副局長陸恭蕙。前者有機會被財金界高薪挖角，後者則因早前擴建堆填區觸礁，備受各方批評，或會對現況感到不是味兒而請辭。另有消息懷疑「跳船者」係梁敬國，可能未上任就打退堂鼓。
部分副局否認傳聞
梁鳳儀接受查詢時，第一個反應係問點解有咁嘅傳聞，再三追問佢會否短期內離任，佢未有一口回絕，僅重申「總之唔係我」。有接近陸恭蕙中人亦代為澄清「唔會轉工、唔會跳蹧、亦無人搵佢過檔」。而有熟悉梁敬國情況嘅人士亦相信，梁好積極期待返新工，已經提早搵定相關持份者商討未來工作大計。至於其他七名副局長，大部分回覆嘅答案都係未聽過有關傳聞，然後就否認其事，好似民政事務局副局長許曉暉否認會「跳船」，反問為何有呢啲傳聞喎。
雖然各政策局否認有人「跳船」，但所謂「空穴來風，未必無因」，除非有人存心放流料，圖搞亂梁班子軍心嘅啫，但無論傳聞係真定係假，政府早啲出來澄清方為上策。