中環出更：林鄭寸謝偉俊「無定向風」
立法會議員謝偉俊（Paul）位於牛頭角下邨嘅議員辦事處尋日開幕，請到政務司司長林鄭月娥同立法會主席曾鈺成做主禮嘉賓。不過，阿Paul就畀佢哋唱雙簧寸爆，話佢無論喺立法會定係對官員嚟講，都係「無定向風」、「無法子知佢係邊一邊」嘅麻煩友喎！
林鄭致詞時大爆阿Paul「好難搞」，透露曾經收到有負責游說阿Paul支持政府政策嘅同事反映，「乜佢（Paul）唔係建制派咩？點解要花咁大努力先可以攞到佢一票？」又話阿Paul喺立法會成日都係最後一個發言，除咗令曾鈺成唔耐煩外，對官員嚟講都好怕佢呢個「無定向風」，因為驚佢失驚無神又會批評、「遺憾」吓政府咁話。
捉唔到路 曾鈺成都怕
之後曾鈺成亦打蛇隨棍上，話阿Paul係其中一個令佢驚驚嘅議員，又話如果同阿Paul同一陣營嘅話，就可以見到佢好似一名悍將咁將對手逐個ＫＯ（擊倒），但如果同阿Paul對陣就會好「論盡」，因為唔知佢會開邊瓣、企邊邊咁話；大家聽到佢哋咁講都忍唔住笑。不過，阿Paul就話，作為議員要有專業判斷同立場，唔能夠一味偏左或偏右喎。
卓妮