政情：袁彌明新卡片 謝絕過「電」
人民力量新主席袁彌明（Erica）日前印咗一批新卡片，但卡片上只印有電郵地址同傳真號碼，並無印上手提電話號碼。Erica早前聲稱受到一名自稱人力前義工不停追蹤騷擾，除咗報警處理外，最後更要鬧上法庭先可以平息事件，莫非Erica至今仍然猶有餘悸，所以唔敢喺新卡片上印上私人電話號碼？
擔心癡漢打嚟騷擾
Erica承認，係因為擔心再有癡漢不停打電話騷擾佢，所以先決定唔印私人電話號碼，又話其他人力執委都同意佢嘅決定。
佢又透露，雖然上次騷擾事件告一段落，但最近又有前職員喺佢嘅社交網站寫冒犯性言論，嚇到佢再度花容失色，所以決定都係唔好再向咁多人透露個人資料，以免再被人騷擾，但暫時未有計劃報警。
佢話將來會開個新電話號碼方便處理黨務，又話支持者可以寫電郵畀佢。至於點解唔印公司電話，Erica就大嘆人力至今仍未搵到新辦公室，惟有「寄居」兩位立法會議員寫字樓處理人力雜務，要等搵到新總部後先可以有公司電話喎。