政情：中環出更：兒童基金籌款名人夾Band
搖滾無分年齡，一班中學生早前喺中環藝穗會與城中名人夾Band，為「樂兒計劃成長基金」嘅音樂培訓課程籌款。鍾意唱歌嘅博愛醫院副主席陳李妮（Lily）及圓玄學院副主席湯修齊（Henry）齊去獻唱支持。基金副主席兼「霓虹光管大王」後人譚浩瀚（William）話，好開心當晚順利籌到足夠款項，又可以支持多一間中學學生，透過夾Band找尋人生方向。
William係呢場「眾樂樂Jam Sound慈善音樂會」搞手，兩年前佢哋首次喺香港道教聯合會圓玄學院第三中學推出《Music for All音樂計劃》，資助基層家庭學生夾Band，成果豐碩，兩年來已培養逾百名學生。
陳李妮獻唱 緊張手震
眼見學生受音樂陶冶而散發正能量，佢同好友兼基金主席李煥明（Wendy）決定大搞，為資助第二間中學而籌款。自細就學鋼琴及鍵盤嘅Wendy，同電台DJ關逸基等好友組成「Timeless」樂隊，當日仲粉墨登場添！
Lily同William係多年老友，自然出錢出力支持。Lily平時卡啦OK唱得多，但現場與樂隊合作獻唱就屬首次，所以緊張到手震。Henry亦好有心，當晚啱啱由美國返港，一落機就到現場Jam歌。Henry話，早前無意中獲悉圓玄學院旗下中學係基金嘅受惠機構，所以無論幾忙都要去支持喎。
卓妮