政情：公民講場：Ann蔣護波大戰「抽水王」

立法會議員蔣麗芸（Ann）前日喺立法會發展事務委員會力撐捲入利益衝突風波嘅發展局局長陳茂波，佢嘅「發癲論」更令「倒波」議員范國威（Gary）挺身而出，批評佢侮辱議員。阿Ann尋日就喺電台節目解構自己嘅「發癲論」，強調當時係指全世界反對派都想執政者落台，而當日嘅反對派議員又掃枱、又拍門，先至令佢有感而發喎。阿Ann仲揶揄Gary係抽水王︰「我都成日畀人話我發花癲o架啦，有咩唔妥？陳茂波都畀人『質』咗幾日，依家係咁意話番一句，咁都接受唔到，係佢哋EQ（情緒智商）唔夠啫！」阿Ann不惜一切去護波，真係辛苦晒喇。