政情：風波不斷 范太籲港府反省吓

指陳啟宗「大罪人論」言重

范太尋日出席活動時被傳媒追問點睇陳茂波囤地事件，范太就首先強調唔想人哋話佢抽水，佢亦無意抽水，只係見記者等佢咁耐先至講兩句。

范太話政府一年都發生好幾次呢啲事件，佢認識嘅中產都對政府存疑，依家正係一個契機等政府反省吓，睇吓對外界嘅表達方式係咪足夠。

對於被喻為「梁粉」嘅恒隆集團主席陳啟宗批評財政司司長曾俊華係歷史「大罪人」，范太就覺得呢番說話言重喇，又話當年港澳辦前主任魯平都鬧過前港督彭定康係千古罪人，「其實魯平成段說話好有意思、好有內涵o架，但大家都淨係寫千古罪人，呢個係冇咩必要嘅。」而佢就覺得鬍鬚曾撥款一百億元落社福政策，手筆唔細咁話。