政情：李國麟升呢立會唯一教授
今屆立法會內，有博士銜頭嘅議員有幾個，但教授就一個都冇。不過，喺公開大學教授護理及健康學部嘅衞生服務界議員李國麟就實現零的突破，最近成功申請升呢成為正式教授。李國麟話，去年十月報名申請做教授後，要等大學及海外評審委員會批核佢嘅教學工作、研究論文及公職等，等咗差唔多一年時間先至成事。
李國麟憶述，起初等咗半年都音訊全無，仲以為自己攞唔到，但大學喺上月終於通知畀佢呢個教授資格，而且今年只有三、四個人攞到，算係一種肯定咁話。做咗教授之後，係咪多咗嘢做呢？佢就話，都係常規工作啫，喺立法會見吓學生，教吓啲散堂及繼續做研究等，但以後會對自己要求再高啲，以符合教授嘅要求。