近排網上流傳一段小學Miss爆粗鬧警察嘅片段，教師係社民連成員林慧思！本月十四日下午，法輪功同香港青年關愛協會（青關會）成員喺旺角行人專用區衝突，警方到場拉起封鎖線包圍成個法輪功攤檔，企圖調停。但期間有個着橙衫嘅女途人唔滿意警方偏袒青關會，走入封鎖線辱罵警察「八公、八婆」，甚至爆粗，有差人大聲叫佢走返出封鎖線，但亦有阿Sir好有耐性叫佢「冷靜啲」，罵不還口。
橙衫女途人大聲鬧人段片一上載到互聯網，就即刻畀人起底，原來佢係寶血會培靈學校嘅中文科小學教師林慧思，佢兩年幾前加入社民連，爸爸係前民主黨成員、現任社民連成員林森成。網民對件事嘅意見兩極，有人怒轟林慧思教壞學生，甚至打去學校投訴，要求炒咗佢，又讚警方有禮貌，係咁畀「Like」。亦有人「撐」Miss Lam夠薑公開鬧警方，發起一人一電郵運動，寄電郵到學校聲援佢。
Miss Lam尋日發表聲明，表示真誠向學校、同事、家長及學生致歉，該校都發聲明，希望家長同社會人士諒解。