- on.cc 東方互動主頁
- 4月27日 (日)
時下男士護膚風氣愈來愈盛，好多都願意花錢打理儀容，務求乾淨企理靚仔啲。港協暨奧委會會長霍震霆嘅二公子霍啟山，向來青靚白淨，暗瘡同雀斑都唔多粒，相信護膚品都幫佢唔少。卓妮早幾日就見到啟山現身喺中環置地廣場地庫一間美國品牌護膚品專門店，選購男士潔面啫喱，仲順道買埋護膚品送畀媽咪朱玲玲，認真乖仔，但唔知佢媽咪啱唔啱用呢？
當日下晝三點半鐘，卓妮見西裝骨骨嘅啟山喺護膚品專門店內游目四顧，好快就搵到男士護理產品嘅貨架，佢毫不遲疑咁攞咗一支全效潔面啫喱。啟山揀得咁爽快，應該對有關產品唔陌生，可能係曾經用過覺得效果唔錯，返轉頭再幫襯都唔定。而啟山所選購嘅潔面產品，不但可以清理皮膚角質，而且能夠控制臉部油脂，兼且有保濕功效，好適合炎夏使用。
當啟山走埋收銀櫃枱準備付款之際，佢嘅目光又被附近陳列嘅卸妝水同潔面乳等護膚品所吸引，遂向店員請教一系列產品嘅功效同使用方法，而店員亦好殷勤咁同佢講解。過咗五分鐘後，啟山就決定買多幾件護膚產品。起初以為佢買護膚品送畀女友，但啟山話啲護膚品主要係送畀媽咪喎。不過，朱玲玲係咪呢個品牌嘅捧場客就唔知，但有個孝順仔就肯定喇。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
