工聯會「雙料議員」陳婉嫻尋日衝出黃大仙，喺沙田乙明邨開設議員辦事處，嫻姐一身鮮粉紅連身裙，相當搶鏡。而可能由於嫻姐同勞工及福利局局長張建宗喺長者生活津貼撥款嘅牙齒印仲未散，所以政府改由政務司司長林鄭月娥代表出席，而林鄭嘅粉紅色上裝打扮更同嫻姐襯到絕，兩人一見面就「姊妹花」咁搭晒膊頭相當老友。不過嫻姐向我哋透露，實情佢喺林鄭耳邊施壓，勸佢唔使旨意喺將軍澳擴建堆填區喎。唔知嫻姐呢招溫柔施壓使唔使得呢？
（周依露攝）
