中環出更：唔做運動 「青」春常駐

黎教授嘅衣着就好似佢嘅人生寫照，永遠比人走得更快更前。呢位「神童」三歲讀小學，十六歲獲港大醫學院破格取錄，成為香港最年輕醫科生，同班有現任醫學院院長李心平，三年級已兼任講師，教番啲年紀仲大過佢嘅一年級生。

堅稱咖啡可防癡呆

講都唔信，黎教授出年六十五歲，難得佢由外至內都仲好年輕。佢話未諗過退休，亦唔會出私家市場賺大錢，因為佢無興趣做月球人、星球人（每月或每星期搵一「球」，即一百萬），最希望三年後港大嘅黃竹坑私家教學醫院啟用，可以畀佢繼續服務公眾。

至於佢點樣keep得咁fit，黎教授話平時喺醫院咁忙已「燒晒脂」，平時無運動習慣。佢仲話自己平時唔飲清水，只係愛飲咖啡同健怡可樂，聽落唔係太健康，不過佢就堅稱：「咖啡可以防老人癡呆o架！」

卓妮