政情：貪曾遺禍 港硬食惡果
我哋上周提到，貪曾前特首曾蔭權爵士落任前開空頭支票，答應建一萬五千間公屋，搞到現屆政府到依家都仲未能落實佢開嘅空頭支票。其實好大喜功嘅貪曾喺任內提出嘅十大基建，到依家唔係超支就延期，有啲連影都無埋。原來財經事務及庫務局（庫務科）當年都勸佢唔好做呢啲工程，認為極不實際，佢當然唔會聽，結果庫務科嘅「預言」至今一一「應驗」。
煲呔曾○七年宣布興建十大基建，以為開出期票呃掌聲，就可以幫佢爭取連任。當年庫務科認為工程極不實際，同一時間興建十大基建，將會大大推高工程嘅建築成本，建造業人手亦會突然短缺，而且年期長嘅工程一定受通脹影響而嚴重超支，可惜煲呔曾全部聽唔入耳，堅持拍板興建，政府內部惟有頂硬上照做。
超支延期兼「失蹤」
時間永遠係最佳證人，過咗近六年，十大基建能夠按時完工少之又少（另見表）。最好嘅算係南港島線東段，預計二○一五年竣工，其餘九大工程就慘囉，沙中線一拖再拖令造價不斷超支，由當初三百幾億急升至最少八百億埋單，最快要二○一八年至完工。屯門西繞道同屯門至機場連接路不停延誤，到依家都只做緊工地勘察。
除咗工程延誤，超支嘅十大工程多到數唔晒，廣深港高鐵因為施工進度緩慢，被承建商索償幾十億元，西九文化區未起已傳聞超支二百億元，要周圍諗辦法撲水。港珠澳大橋就漏做環評報告被司法覆核，拖慢工程進度。
講就無敵 做就乏力
十大基建中有唔少已經「失蹤」，例如落馬洲河套區同港深機場鐵路，兩者到今時今日只係空中樓閣。新市鎮發展亦因為新界東北爭議被叫停。有啲基建甚至鬼祟縮水，好似啟德發展計劃，現時只搞掂郵輪碼頭，但啟德體育城，都仲係紙上談兵。空有構想而執行能力不足，咁同發夢有乜分別？