中環出更：利蘊蓮男性朋友陪入馬場
尋日沙田馬場出現稀客，佢就係希慎主席利蘊蓮（Irene）。佢受佢嘅堂弟即馬會大董利子厚（Michael）伉儷嘅邀請，低調入場湊熱鬧，同行仲有一位男士同Irene孖住行，期間主動翹住Irene手臂，兩人似乎好熟絡。卓妮上前同Irene打招呼，問佢身邊男士係佢邊位？佢即禮貌微笑回應：「佢係我朋友。」不過當問到關於其集團嘅發展，佢就話唔想喺度多講嘞。
尋日戴住黑超嘅Irene，同男友人、Michael及堂弟婦Munkhzul現身馬匹亮相圈，皆因Michael有份擁有嘅團體馬「愛馬奔騰」首度出賽，佢哋齊齊為愛駒打氣，結果以一個馬鼻之差屈居第四。少有入馬場嘅Irene，觀賽時候睇得甚為肉緊，拎出鮮黃色機殼嘅智能手機，頻頻拍攝馬匹衝線一瞬間。
Irene心情靚爆，不時同堂弟婦Munkhzul細語交談，仲指住出賽馬匹研究一番。身為蒙古人嘅Munkhzul，穿上藍色花花連身裙，充滿夏日氣息，近距離見到駿駒，更興奮得手舞足蹈。Michael見愛妻咁高興，主動揸機幫佢同馬匹影相留念，Munkhzul喺鏡頭前叉腰擺出嬌俏甫士，不知幾陶醉。
陳南祿拖女兒現身
尋日係父親節，卓妮見到唔少爸爸都帶埋子女入馬場享受天倫樂。馬會大董陳南祿（Philip）拖實成功瘦身嘅乖女Michelle入嚟，身形高挑嘅佢愈大愈靚，真係女大十八變。睇見Philip笑到四萬咁口，唔使講都知佢有女萬事足啦。
卓妮