幾乎個個立法會議員都身兼多職，如果要認真申報都咪話唔麻煩。財委會尋日討論喺中央政策組之下嘅策略發展委員會開設一個助理秘書職位，其實只係將原有職位延長四年，不過啲議員一個二個趕住喺投票前舉手申報利益。一場低能申報，由黃碧雲（一舊雲）講起。
話說當時仲有唔夠兩分鐘就投票，保險界陳健波、葉劉淑儀同陳恒鑌就申報自己係策發會成員，一舊雲呢個時候就大聲話：「我想問佢哋係咪可以參與投票？」其無知表露無遺。
其實《議事規則》只規定議員喺有直接金錢利益時先需要避席唔投票，秘書處解釋一輪後，一舊雲仍然未瞓醒，再追問策發會成員開會有冇車馬費，財委會主席張宇人（Tommy）就回應話睇唔到車馬費同直接金錢利益有咩關係，有議員仲大聲寸一舊雲：「我都想有呀！」
眼見場面不受控制，Tommy就無奈咁話自己已經幾十歲人頂唔順幾十人一齊講嘢，之後又無厘頭爆出一句：「我係牛年出世當然係辛苦命，不過你哋唔好搞到我更加辛苦。」講到呢度，議員們竟然爭相申報自己嘅生肖。