政情：廖長江有鏡頭恐懼症
「掟蕉」、「拉布」或喺立法會會議廳內日以繼夜，夜以繼日咁寫大字，以上種種可能係普遍市民對立法會嘅印象，主因係相關議員「夠出位」博得傳媒注意。不過，亦有議員就對鎂光燈敬而遠之，仲講到明對住鏡頭會感到唔舒服，呢位「另類議員」就係中華總商會代表廖長江（Martin）。
嫌「根治」課程學費貴
Martin本身係大律師，面對鏡頭同人唇槍舌劍本應有一定心得，但Martin話上庭同對住鏡頭唔同，因為上庭基本上只係對住法官闡釋論據，所以目標好清楚，相反佢一對住鏡頭就覺得唔舒服，所以做議員至今都推咗唔少電子傳媒訪問。佢又話，其實都諗過解決辦法，就係搵吓有冇教人面對鏡頭嘅課程，但佢笑言由於課程太貴，自己負擔唔起喎！
事實上撇除作為議員曝光率相對較低，Martin呢個議會新丁都擺咗唔少心機時間喺議會，佢自爆上任首月，開親會都坐定定聽足各位議員發言，並記低重點，但發現基本上每次辯論重點都係五、六個，當有人講咗佢想表達嘅內容，佢就唔會重複論點，一切以有冇新論點表達為出發點，認真有自己一套議事風格。