「一朝得志，語無倫次」，係形容有啲人得意忘形，亂發噏風，幾乎連自己姓乜都唔記得。功夫茶講緊邊個？咪就係廢官翻閹嘅周一嶽囉。
人稱「每周一鑊」嘅周一嶽，自從被港府廢物回收做咗平機會主席之後就飄飄然，成個鹹魚翻生咁嘅款，日日指手畫腳，說三道四，係又噏唔係又噏。呢嗱，呢位廢官尋日又有嘢講喇，佢話喎，香港將來落實普選要依照《基本法》同國際公約，需要有提名及初選機制，仲話唔擔心會選出唔愛國愛港嘅人做特首，希望中央多啲信任港人云云。
咁就好笑喇，周一嶽只不過係平機會主席咋，幾時輪到佢講普選吖？唔通佢以為自己仲係問責局長？平機會網頁寫得清清楚楚，該會係一個法定機構，負責執行四條反歧視條例，包括《性別歧視條例》、《殘疾歧視條例》、《家庭崗位歧視條例》及《種族歧視條例》。左睇右睇，上睇下睇，都睇唔出邊樣嘢同普選有關，周一嶽自己分內事都未搞得掂，居然多管閒事撈過界，簡直不知自量，九唔搭八。
其實，周一嶽語無倫次已經唔係第一次嘅喇，佢仲未正式上任前就亂咁發炮，指教育局過去咁多年對少數族裔嘅教育工夫做得唔足，令大批少數族裔青少年讀唔到大學，減少向上流動同晉升機會；而接掌平機會之後更加多嘢講，限奶令、普選、內地禽流感等等，統統關佢事，統統有意見，當正自己係萬能俠，唔知嘅畀佢嚇死，知道嘅畀佢笑死。
喂，唔好唔記得，周一嶽擔任問責局長八年期間，醫療事故頻頻，疫症爆發連連，雙非問題後知後覺，醫護短缺束手無策，連骨灰龕都搞到一塌糊塗，徹頭徹尾就係一個庸官廢柴，佢從來唔識反省，又有乜資格批評其他人吖？
老實講，周一嶽唔只冇資格批評其他人，而且冇資格擔任平機會主席添吖。正如早前「東方報業民意調查」顯示，唔少受訪市民指佢掌管醫療衞生期間一無是處，政策混亂，濫竽充數，表現拙劣；另有唔少市民認為佢麻木不仁，難為弱勢社群主持公道。嗱，群眾眼睛係雪亮嘅，港府翻閹廢官，根本就係與民為敵，愚不可及。試諗吓，港府民望一直低沉，仲要收留呢啲負資產，豈不是雪上加霜？唔怪得有人話港府政治自殺，真係冇講錯o架。
再講喇，平機會本來已經醜聞多多，被視為徒有虛名嘅政治花瓶，依家仲要落喺廢官手上，究竟係臭罌出臭草，定係臭草出臭罌，真係講唔清。唉，國之將亡，必有妖孽，可能香港真係氣數已盡啩！