「佔領中環」（佔中）行動成為泛民主派爭取普選嘅最大政治籌碼，各界都金睛火眼（目及）實佢哋嘅一舉一動。就喺呢個時候有市民爆料話，佔中行動發起人、港大法律系副教授戴耀廷捲入派錢「收買」支持者出席論壇疑雲，話參加者有最多一百元車馬費。不過，經查證後發現原來論壇係香港電台舉辦，所以係港台派錢畀參加者至真。
我哋近日接獲市民投訴，聲稱有人代表戴耀廷抽籤訪問市民知否佔中行動嘅目的，又指即使唔知都唔緊要，因為佢哋遲啲有個講座喺九龍塘，到時會有講者詳盡解釋，又會提供茶點同一百元車馬費畀參加者，於是質疑戴耀廷利誘支持者出席論壇，為佔中行動製造聲勢。
我哋按爆料人提供嘅電話問個究竟，最終竟然搵到港大民意研究計劃代表李先生回應事件。佢話事情嘅真相係港大民研同港台合作某節目論壇，暫定於下月五日舉行，主題係同特首普選有關，其中港大民研會以電話隨機抽樣抽出一百名市民參加，事後可獲港台派發最多一百元車馬費。佢又話，有關方面會邀請四名嘉賓出席論壇，其中一人可能係戴耀廷。