政情：唱同志歌虐待聽眾廢鑊踩過界談政改
正所謂「不在其位、不謀其政」，但外號「周一鑊」嘅平等機會委員會主席周一嶽，尋日接受電視台訪問時就又再踩過界亂噏。任職政府時鮮有談論政改問題嘅佢，喺節目中高調評論二○一七年特首選舉辦法，話自己支持有提名同初選制度，希望初選機制有廣泛代表性、增加普及元素等，好似變身做政制及內地事務局局長同全國人大政協咁，唔知係咪同佢喺前晚高唱「嶽曲」時唱到上晒身，high過頭忘記咗自己身份有關呢？
周一鑊早前一曲走晒音、甩晒嘴嘅《忘不了你》，震驚政界同嚇親唔少市民。前晚公民黨舉行籌款晚會，請咗佢同著名「出櫃」歌手黃耀明，合唱同志名曲《禁色》同《Amazing Grace》籌款。期間周一鑊唱到摸晒頭、咪晒眼，好似鬼上身咁，相信「龍婆」羅蘭見到都嚇一跳，好彩有歌喉了得嘅明哥傍住，把聲先至冇嚇壞在場嘉賓。
盛智文歌喉半斤八両
除咗周一鑊同明哥，海洋公園主席盛智文亦獲邀到場獻唱《My Way》。有在場人士形容，盛智文嘅歌喉原來比周一鑊更加難頂，任何人聽過佢唱歌之後都絕對「忘不了你」！