政情：十八區宣傳免頻撲 李慧琼獲40萬元戰車
立法會超級議員李慧琼（Starry）作為三料議員，經常要走勻全港十八區，公務非常繁忙，最近該黨就仲用四十萬元購入及改裝咗一架貨Van，供Starry用作流動辦事處及宣傳戰車。該黨主席譚耀宗（譚Sir）日前透露該黨未來工作時，就提到已訂咗架貨Van，之後改裝一吓就用得，約一個月後面世。
榮升「第一」副主席
雖然譚Sir口口聲聲話所有黨內議員都可以用呢部宣傳戰車，但就話考慮到Starry身為超級議員，要睇晒全港十八區，尤其新界地區咁大地方，周圍頻撲要用好多時間。加上現時喺屋邨難求議員辦事處舖位，私人商舖嘅租金又貴，所以有架戰車可以方便會見市民。譚sir講到咁，黨內其他議員仲好唔好意思借用呢部戰車呢？
其實早前我哋講過，Starry喺農曆新年期間，最高峰一日走八場團拜，真係分身都唔掂，有架專車點都方便嘅。雖然佢咁忙，但明顯被黨看重，睇番日前該黨改選後嘅新一屆領導層名單，Starry係五位副主席之中排名第一，頂替咗因加入政府而變為普通黨員嘅劉江華位置，加上Starry獲贈四十萬元御用戰車，喺黨內地位不言而喻喇。