政情：申訴署踩場 監警會反彈
如果市民不滿被警方老屈或無禮對待，可以向警方轄下嘅投訴警察課投訴，再由獨立監察警方處理投訴委員會（監警會）覆檢結果，但如果市民不滿監警會嘅覆檢進度同決定，就只能夠向番監警會投訴，無權搵申訴專員公署（申訴署）調查處理。據聞港府有意將監警會納入申訴署嘅監管範圍，進一步保障市民權益，但係就遭到監警會內部強烈反對，掀起一輪內部爭拗。
申訴專員公署係一個獨立法定機構，專責處理市民對政府部門或公營機構嘅行政失當投訴，但原來目前只有約八十個機構受到申訴署監管。政府同申訴署每隔幾年都會進行檢討，研究應否擴大申訴署嘅監管權力同範圍，例如早幾年就將新成立嘅西九文化區管理局同競爭事務委員會、喺合併改組後改埋名嘅通訊事務管理局辦公室，以及一直無納入監管範圍嘅醫療輔助隊，加入《申訴專員條例》附表，令申訴署有權處理市民針對有關機構嘅投訴。
警務處亦不受公署監管
有監警會委員透露，申訴專員黎年早前要求政府，將監警會納入申訴署嘅監管範圍，原因其他同監警會類似嘅獨立法定機構，好似平等機會委員會咁，現時都受到申訴署監管，無理由唯獨監警會可以豁免。不過，有唔少監警會委員都唔贊成有關建議，一來監警會只負責覆檢投訴警察課處理嘅投訴個案，唔似平機會咁有權直接收投訴同與投訴人接觸；二來依家受到監警會監管嘅警務處，本身亦不受申訴署監管，點解反而監警會要受監管呢？
對於支持建議嘅人指出，申訴署僅有權處理針對行政失當嘅投訴，例如監警會覆檢個案歎慢板、冇交帶、程序有甩漏等，唔會干涉監警會對個別個案嘅具體決定，監警會毋須過分擔心。但有監警會委員反駁，難保有啲投訴人會將自己對警方同投訴警察課嘅不滿，轉為向監警會吹毛求疵，繼而向申訴署投訴洩憤，就算有關投訴最後獲證實無事實根據，都會浪費監警會一輪時間同工夫。監警會反對受監管嘅聲音咁強烈，唔知監警會主席翟紹唐有乜辦法拆彈呢？