中環出更：韓國人團結 劉展灝感觸
朝鮮半島近日戰雲密布，兵戎相見一觸即發，為咗人身安全，好多人都取消訪問南韓嘅計劃。不過，工業總會副主席劉展灝（Stanley）為咗傾生意，早前就去咗南韓首爾一趟，佢話喺戰爭威脅之下遊客明顯少咗，然而南韓民眾同政府都好齊心，唔怕北韓嘅挑釁，佢話團結呢方面，香港近年就做唔到喇。
訪首爾睇鐘錶市場
Stanley話，今次視察當地鐘錶市場嘅行程好早就安排好，惟有硬着頭皮出發。佢話由登上航機開始，就發覺乘客唔多，而當地市面人流疏落不及往常熱鬧，酒店職員仲同佢講，連日來好多訂房都取消咗。Stanley話，雖然目前局勢如箭在弦，但當地民眾未有嚇怕，兼且支持政府態度強硬。
佢又話，今次南北韓劍拔弩張，雖則大家都認為北韓可能只係虛張聲勢，但難免令人擔心北韓領導人太年輕，若然佢意氣用事，將國家前途「盡地一煲」，咁就大件事喇。
卓妮