中環出更：準新郎蔡加讚唔急買金
近期金價急挫，對於準備嫁娶嘅人嚟講應該係好消息。不過，將於年尾做「老襯」嘅喜運佳鐘錶主席蔡加讚（Karson）就認為，金價仲有得跌，要趁低吸納依家仲未係時候喎。
一身清爽衣着嘅Karson同未婚妻汪圓圓尋日現身沙田馬場，佢話係應朋友邀請入場。由於今年十一月佢哋就會拉埋天窗，會否趁金價下跌買番啲婚嫁金飾？Karson就話，雖然近日金價曾急跌，但其實呢個跌浪已經持續咗一段日子，估計金價走軟嘅趨勢仍然會繼續。由於現時距離婚禮仲有幾個月，所以佢話目前唔會急於買金咁話。
梁智仁帶愛犬遊英
卓妮同場又見到香港大學校長徐立之同公開大學校長梁智仁，佢哋都係獲邀出席賽馬會社群盃賽嘅嘉賓。梁校長離開馬場後就要搭飛機到英國，除咗探望喺倫敦生活嘅細仔，仲會會合較早前到埗嘅太太梁許安璞，同埋四歲愛犬Muffin，開始佢哋長達四星期嘅英倫之旅。
梁校長坦言，帶同狗隻出門遠行都好麻煩，因為除咗檢疫工作，航空公司亦要喺飛機貨艙搵位安置狗隻。至於票價就係按狗籠嘅尺寸計算，佢話今次為愛犬買機票就花上幾萬元，比起乘客票價貴得多。
由於佢同太太都係愛狗之人，早已視Muffin為一分子，實在不忍愛犬獨留在家，故此有機會就要帶愛犬出去領略一下異國風情喎。
無獨有偶，梁校長同徐立之都係任期即將屆滿嘅大學校長。梁校長話，退休之後會做吓義工，仲需要多啲時間陪家人，故此唔會倣效兄長梁智鴻咁做公職王。至於徐立之，佢話目前專心工作，無暇細想退休之後嘅去向喎。
卓妮