「Benz佬」切線爆粗 醜態上網

客貨車司機響號　雙方互罵

相信是由客貨車行車錄影儀器所拍下短片，前日上載至互聯網，標題為「唔洗識揸車既BENZ佬」，片長一分三十二秒。片中所見，事發於本月十二日早上十時四十四分，錄影機前是一輛米色Benz房車，在將軍澳華人永遠墳場近靈灰閣對開行駛，懷疑突然切線引發尾隨的客貨車司機不滿響號。

「Benz佬」隨即煞車及下車，怒氣沖沖急步走向後面客貨車，手指指對住司機，「Benz佬」先大聲質問：「點呀﹖你想點呀﹖我見你行得慢嘛，咪出囉」，客貨車司機不甘示弱大聲反問：「你識唔識交通法例呀﹖」

「Benz佬」「寸嘴爆粗」道：「唔識（交通法例）呀，我淨係揸Benz啫，你想點吖﹖……我使×識揸車呀」。

雙方鬧得怒火上心，客貨車司機連珠炮發反罵「Benz佬」：「唔識揸車返大陸啦，你呢啲人好似大陸咁揸車，鍾意出就出，鍾意撞埋嚟咪撞埋嚟囉」；更嚴厲語氣教「Benz佬」駕駛，「你讓線係一定要讓晒主車線o架，要等啲人走晒先o架」。

「Benz佬」被罵至「無癮」，看似無法再辯駁後便自行「撤退」返回Benz座駕，但一直坐在Benz內的女子則突然下車，但見形勢不對勁，便跟隨「Benz佬」返回車上。不過，客貨車司機仍深深不忿，繼續向他「爆粗」發洩不滿「你唔×識揸車就再考過啦，知唔知呀﹖唔識揸車仲話『我自己揸Benz』，食×啦，Benz大晒呀!」

短片發布人先留言指：「疑似大陸考牌嘅惡人」，其後短片的點擊率陸續增加，至昨晚七時已高逾三百次點擊。不少網民看畢後留言大鬧「Benz佬」，「香港揸Benz要有牌……大陸揸啦！影衰晒香港有牌的Benz！」亦有網民指：「佢D咁嘅駕駛態度，梗係要揸BENZ啦，揸架鋼水差D嘅都驚命唔長呀」。