- on.cc 東方互動主頁
- 4月8日 (二)
近來「佔領中環」運動講到似層層，連本身係醫生嘅公民黨立法會議員郭家麒亦唔執輸，以個人名義「代表」整個醫療界成立醫療服務隊，為參與佔中嘅市民提供醫療支援，更聲稱已經有十幾個醫生、護士支持添！不過，尋日畀面撐場嘅醫護人員只得小貓三四隻，拍硬檔支持嘅麻醉科專科醫生胡可源，發言時更揚言「唔理解佔中」兼對呢場運動「存疑」。胡醫生咁講，令人懷疑郭家麒係夾硬捉人上轎。
今次呢個醫療服務隊，係郭家麒聲言擔心呢場強調和平、理性、非暴力嘅運動會有群眾生事而成立，屆時會「係人都救」，唔理對方係咪支持佔中，認真偉大。郭家麒更自命孫中山先生同印度聖雄甘地，誓言願意犧牲個人專業資格，唔怕被人拉咁話！
郭家麒講到咁激昂，不過，間唔中會同佢拍住上示威嘅發起人之一胡可源，竟坦言「唔理解佔中」，仲話每日工作量已經夠多，要佢放工後留守中環真係咪搞，明言只會「精神上支持」。運動一開始已經鬼打鬼，而郭家麒所屬政黨公民黨對佔中嘅態度曖昧，今次郭家麒點收科？
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
