假如你唔知點解同舊情人分手，好衰唔衰新情人係三尖八角又騎騎呢呢嘅怪人，你會有乜嘢諗法呢？其中一個最有可能嘅諗法大概係咁：早知就唔同舊情人分手啦，重拾舊歡最好嘞。
舊歡如夢歌仔都有得唱啦，當年相戀意中人，大家性情近……功夫茶之所以同大家談談情又說說愛，無非因為有感而發。大家有冇留意近來有人煽動「香港要獨立」，遊行示威硬係要揮舞殖民地時代嘅港英政府旗幟？鼓吹港獨嘅原動力，好大程度上同過氣特首曾蔭權有關，鬼叫貪曾治港七年咁失敗咩，施政作風三尖八角又騎騎呢呢，覺得新不如舊嘅香港人咪發思古之幽情囉，諗到港英政府呢一個舊情人係幾咁銷魂得令人欲仙欲死，所以就做出「反中復英」嘅放肆行為。
有一個自稱「我哋係香港人，唔係中國人」嘅群組，元旦遊行不但高叫「香港人管治香港」以及「反對西環治港」嘅口號，更加去到中聯辦門外火燒五星旗，而且播放英國國歌，你都咪話唔係放肆o架。
對於呢一股港獨之風，「東方報業民意調查」結果顯示，四成七受訪者認為主要原因同過去政府施政無能有關，令部分人緬懷港英殖民統治時代；兩成五覺得有人利用中港矛盾鼓吹港獨；兩成一直指香港政治生態畸形。
既然緬懷港英殖民統治時代同過去政府施政無能有關，邊個係罪魁禍首呀？兩成九受訪者話呀，曾蔭權施政無能，令人感到治港失敗；兩成三認為貪曾種下禍根激起公憤，令港人不滿現狀。
呢嗱嗱嗱，貪曾遺禍真係唔講得笑，若然鼓吹港獨蔚然成風，要求獨立變成一場有組織嘅運動，貪曾肯定係一個不可饒恕嘅千古罪人，破壞國家領土完整吖嘛，導致九七回歸變得毫無意義可言。
當然，鼓吹港獨暫時未成氣候，三成受訪者認為係政客抽水，乘機攻擊政府；兩成九擔心年輕人被利用，人云亦云；一成七質疑有外部勢力挑起社會矛盾。之不過咁，防患於未然都係應該嘅，三成九市民促請政府關注發展，不能掉以輕心；兩成四覺得港府必須正視問題；一成七要求港府提高警惕。
計功夫茶話齋，新情人只要唔太醜樣又唔太惡頂，吸引力一般都會高過舊情人。亦即係話，現屆梁振英政府只要表現得冇咁甩皮甩骨，唔似得貪曾時代咁顛三倒四，消除香港人對於殖民地時代嘅緬懷都唔係太難嘅。
套用英國大文豪狄更斯名言，這是最好的時代，也是最壞的時代。港獨如果蔓延梗係壞事啦，不過只要當今梁朝執政集團撥亂反正吹散港獨之風，未嘗又唔係好事喎！