政情：今日你上鏡：盡訴心中情

特首梁振英（CY）前日喺禮賓府舉行嘅茶敍，邀請二百多名來自社會唔同界別人士出席，當中梗係包括一眾「梁粉」啦。「梁粉」中唔少人平日好少機會入禮賓府，所以有人好似大鄉里出城咁，將禮賓府嘅相放上社交網站。「票王」北區區議員劉國勳亦分享咗一幅同CY密斟緊嘅相片。相中見到劉國勳好認真咁表達訴求，而CY又翹住手咁好留心咁聆聽，似乎真係傾緊啲重要事喎。劉國勳話佢趁酒會期間，向CY反映一下地區嘅問題，以及市民對施政報告嘅意見喎。但劉國勳喺特首選舉中咁幫得手，都唔知佢哋傾緊嘅係劉國勳最近關心嘅水貨客問題、北區學童學位問題，定係CY最近再有委任職務想由劉國勳出任呀？（互聯網）