香港「鬧地荒」，特首梁振英同發展局局長陳茂波惟有喺政府內部四圍搶劫地皮起樓，佢哋早前已嘗試向民政事務局局長曾德成同教育局局長吳克儉埋手，密謀將啟德體育城同粉嶺皇后山私校地皮轉為建屋，但最終因體育界同教育局反對而泡湯。最近佢哋又再翻兜打劫兩人，要求民政事務局交出部分原定用作興建社區會堂或體育館嘅社區設施用地，改為興建公私營房屋，又要求教育局逼啲學校借出更多校舍設施畀地區人士搞活動，以換取各區區議會支持割地起樓，睇嚟兩人都係難逃一劫喇！
