新民黨田北辰（田二少）經歷過立法會選舉嘅洗禮之後，的確比以前關注市民嘅訴求，更加對特首梁振英（CY）嘅首份施政報告相當着緊，上周四出席CY為議員設嘅飯局時更搶先獻計。田二少透露CY相當「心水清」，不但記得排喺第二位發言嘅佢問過啲咩，更就每位議員嘅提問逐一回應，唔似得某啲局長回應議員質詢時「事事旦旦」。
原來田二少所指嘅分別係教育局局長吳克儉同商務及經濟發展局局長蘇錦樑（Greg蘇），佢批評二人無論面對幾多位議員提出幾多條問題，都有理冇理以「多謝你嘅意見」敷衍了事。
一眾議員眼見每次嘅提問都得唔到到位嘅答案，都咪話唔嬲，唔怪得田二少直言「講完一大輪，都唔知佢聽到幾多」。
對話題唔熟悉當然就會答非所問喇，好似田二少就對鐵路問題特別熟悉，港鐵上周五派人落立法會鐵路事宜小組委員會，推銷喺南港島線（東段）引入無人駕駛系統。
曾任九鐵主席嘅田二少即時教官上身，提醒港鐵乘客遇上事故時會方寸大亂，有車長坐鎮就可以迅速協助疏散乘客，強調請車長嘅錢唔慳得。