政情：橄欖走音飲歌慰樁腳
做建制派每逢選舉都要有大量地區組織拉票抬轎，但呢個世界邊有免費嘅午餐？樁腳唔會從天而降，所以建制派議員久唔久都要出席地區活動，好好慰勞咁落力嘅地區人士。今時今日，蛇齋餅糉已經太普通，表演跳舞唱詩甚至rap歌粉墨登場，可能令街坊睇得更加開心。
尋晚九龍婦女聯會搞咗個慈善夜，有成三百個公公婆婆參加，但表現者唔係咩天皇巨星，而係班立法會議員。民建聯陳鑑林率先打頭陣獻唱《大地恩情》，佢話首歌易唱又唔太長，幾乎係佢嘅飲歌，雖然有明顯走音，但台下都好受落，仲籌到十一萬元添。
李慧琼朗誦過骨
李慧琼可能知自己唱歌唔得，即席朗誦《愛蓮說》，悶就悶啲，但佢話象徵從政者出於污泥而不染，算佢過到骨啦。成晚最爆一定係蔣麗芸，佢以古裝打扮唱《梁山伯祝英台》，唔唱得都睇得。佢一上台中氣十足，勁多公公婆婆畀like。而本來應承上台rap《快樂西九》嘅梁美芬臨時甩底，好在班公公婆婆唔多覺，可能少佢一個唔少啦。