中環出更：贏錢贏口碑 郭少明馬場得意
尋日沙田馬場賽事頻頻爆冷，好多名人馬主嘅愛駒都大熱倒灶。不過養馬眼光獨到嘅莎莎國際老闆郭少明（Simon）夠晒好運，事關前保良局副主席林文燦囝囝林承毅名下愛駒「路飛」首次出戰，Simon落注一萬元買獨贏捧吓場，結果隻馬以賠率五十六倍嘅勁冷姿態跑出，帶挈Simon贏得五十六萬元獎金。
不過Simon最開心嘅唔係贏錢，而係再次證明自己眼光的確厲害。事關「路飛」原本係佢喺新西蘭飼養嘅馬匹，最近啱啱運抵香港後賣畀老友，估唔到首戰即刻報捷，總算對老友有交代。
其實近年好多城中老友都搵Simon幫手揀馬，而且首戰告捷嘅例子多不勝數，難怪佢對馬匹嘅興趣愈來愈大，仲研究埋配種添！
盧金榮趕得切返港度歲
啱啱以票王姿態當選港區人大代表嘅立法會議員廖長江，都同太太拍拖入場撐愛駒，可惜只跑出梗頸二，未能風光拉頭馬。
躋身馬會遴選會員嘅全國政協委員盧文端，同太太及囝囝盧金榮名下嘅「福建精神」亦有出賽，全國政協常委洪祖杭等福建幫老友齊去撐場，盧金榮亦拖埋好少公開露面嘅太太Patsy入場玩。
最近內地各省市開始開政協會議，好多城中名人忙於北上，福建省政協盧金榮都話今個月底就要去開會，好彩開完會仲趕得切返港過春節，唔使好似往年咁，新年流流就要執拾行裝。
卓妮