中環出更：胡家驃愛收藏 雪茄 藝術品
胡關李羅是本港其中一間大型律師行，合夥人胡寶星兒子胡家驃（Jackson）都係律師，但佢自立門戶另開律師樓。佢興趣多多，除咗跑馬，仲愛旅行同收藏，屋企收埋唔少靚雪茄。至於藝術方面嘅收藏品因比較多，所以就比較佔地方。
身為名門之後，Jackson除咗埋首律師工作外，閒時鍾意旅遊及養馬減壓。由於爺爺當年以經營「喜蓮牌」電髮產品起家，所以胡家名下馬匹都以喜蓮兩字命名。剛過去嘅幾個星期，Jackson喺馬場大殺三方連拉幾次頭馬，好運沒法擋。
太太投訴冇位擺
Jackson話，家人感情融洽，經常十幾二十人浩浩蕩蕩出遊，有幾壯觀可以想像。佢印象最深刻係兩年前去古巴玩，當時古巴仍未完全開放，時光恍如倒流到幾十年前嘅世界，佢仲因此愛上雪茄，屋企收藏咗好多靚雪茄。
Jackson又醉心於收藏當代藝術品，呢個嗜好喺英國讀書時已開始，多年來累積珍藏已過百件，種類五花八門，大至傢俬，小至首飾盒，難怪胡太楊曉鳳經常投訴冇地方擺放喇！
早前胡寶星及Jackson聯同四叔李兆基捐獻巨款資助清華大學興建全亞洲最大嘅法律專業圖書館，身為律師行合夥人嘅Jackson最近更獲聘任為清大名譽校董。對佢嚟講，人生真係多姿多彩。Jackson話，圖書館將於一五年落成，屆時藏書將逾百萬冊，建築面積達一萬平方米，冠絕全亞洲。
卓妮